"Boazu lea juohke diŋgga váibmu ja geahppát"

Bohcconáhkkeduojis dat vulggii johtui. Raisa Kitti duddjo bohcconáhkis sistti, bárkejuvvon bohcconáhki, árbevirolaš vugiid geavahemiin. Guoibmi Janne Kitti lea bargan bohccuiguin eallinagi ja boazodoallu lea bearraša eallima stuora oassi. 

Raisa barggai ovdal dearvvašvuohtadivššára bealleáigásaš virggis Anáris ja jurddašii, ahte juoga lassihommega galggalii ovddidit bálkábarggu báldii. Son duddjogođii bohcconáhkis čiŋaid. Doaibmanammafitnodaga son vuođđudii 2018 ja čiŋaid lassin bohcconáhkis álge šaddat maid sierralágán biktasat ja čiŋahanbuktagat.

Raisa čuohppá bohcconáhki, Janne čuovvu barggu duogábealde. (Govva: Ville Fofonoff)

Raisa fálai maiddái guossástallamiid boazodálus ja duodjebájiid. Eatnasat gussiin leat olgoriikkalaš turisttat.

- Boazodálloguossástallamiin mannojuvvo biebmame bohccuid ja seammas muitalan bohccuid ja boazoolbmo eallima birra. Muhtimat háliidit maid duddjot iežaset mátkemuittu bohcconáhkis, Raisa muitala. - Juos háliida, nu beassá min viesus málestit báikkálaš borramuša bohccos dehe guolis.

Dearvvašvuohtadivššára barggut báhce go Raisa bázii váhnen- ja dikšunfriddjavuhtii jagi 2020. Seamma áiggiid Raisa ja Janne vuođđudeigga oktasaš oasusfitnodat, Renniina.

- Dikšon máná ruovttus ja semmas bargen iežan fitnodagas. Máhccen vel dikšunfriddjavuođa maŋŋel muhtin áigái bargui, muhto álggii leat nu hohppui bargá beallebálkábarggu ja jorahit fitnodaga, Raisa muittaša. Oasseáigásaš fitnodatdoaibma viiddui ollesáigásažžan.

Janne ja Raisa doalvuba bohccuide suinniid. (Govva: Ville Fofonoff)

Fitnodat gullá Lapland Nord mátkeealáhusorganisašuvdnii ja ovttasbargá báikkálaš hoteallaiguin ja mátkelágideddjiiguin.

- Juohke jagi leat eanet ovttasbargoguoimmit ja mátkelágideaddjit. Hohpolaččamus sesoŋŋa lea skábmamánus njukčamánnui.

Jaskadit áigge vuovdin jorrá fierbmegávppi ja ođđasiidvuovdinfierpmádaga bakte. Dalle ráhkkanuvvo maid boahtte badjái.

Doaibmasadji dálonguovloruhtademiin

Dađistaga doaimma viidumiin čielggai, ahte boazodállui dárbbašuvvo visti, mas leat lanjat duodjebájiide, duddjomii ja bohccobierggu vuovdimii sihke bohccočoarve- ja muorradujiid duddjomii. Doarjja investeremii ohccojuvvui EJB-guovddážis.

- Hui sakka dasa galggai rehkenastit ja čájehit, ahte dát duođaid gánnáha, Raisa lohká. Doarjja lea dušše oassi goluin, eatnasa máksá fitnodatdoalli ieš.

- Moai letne seastán dán investeremii ja loanaid ain mákse. Ean livčče bastán dán sturrosaš investerema dahkat almmá doarjaga haga, Raisa ja Janne máidnuba. 

Ollašuhttin manai bures ja árvvoštallon bušeahtta doali oalle bures. Sajit váldojuvvoje atnui juovlamánu álggus.

Plánat leat maid boahtteáigái ja ulbmilin lea ovddidit doaimma ain ovddosguvlui.

Raisa fitnodatdoaibma álggii bohcconáhkkečiŋain. Fergejuvvon bohcconáhkki sierraivdnasaš bohcconáhkkečiŋaide ostojuvvo dálu olggobealde. (Govva: Ville Fofonoff)

Dálkkádatrievdan geahččaladdá árbevirolaš boazodoalu

- Dálkkádat lea sakka rievdan, smiehtada Janne.

Janne muitala, ahte golbmalogi jagi dás ovdal dálveguohtuneatnamiin duoddariid vuolášvárit ledje jalggážin. Dál leat várit obbon sogiin, subiin, sarrihiin, joŋain ja beziin. Seammas jeageleatnamat leat gáržon.

- Guhká lei nu, ahte dárbbašii addit suinniid dušše njukčamánu beallemuttos cuoŋománu beallemuddui. Dál lea šaddan biebmagoahtit eambbo.

Govva: Ville Fofonoff

Nohkavaš boazodoallojahki lea leamaš Janne mielas roassun. Vearrámus lei diimmá geasi measta čieža vahku oktilis goike ja báhkka áigodat. Gáldut ja jogat goike.

- In leat duokkáriid goit oaidnán ovdal, eaige leat gul boarrásatge (boazoolbmot).

Geassemánu miessemearkuma maŋŋá jávke goalmmádas misiin.

- Báhkat ja goikkádagat sotnade misiid. Deikenai bođii dat vuorrádus, setaria (luhtehaš), mii lea gávdnon misiid siseallagiin, vuoivasis ja čoavječuosis, Janne muitala. - Spiriid njálbmái manai iežas oassi.  

- Dat mat báhce, eai deaddán olus maidege, iige dain lean eallomiessinge. Lei ribihis geaseáigge jávku. Ovddit jagi mis ledje miesit buoremus ortnegis.

Jáhkku ealáhusa bistevašvuhtii lea goitge ain nanus.

- Boazodoallu ja turisma – goappašiin lea bággu dušše luohttit boahtteáigái fuolakeahttá áitagiin, čoahkkáigeassá Janne.

Tanja Ylitalo