Bálvalusat sámegillii

Lappi EJB-guovddážis leat máŋggat iešguđetlágan ealáhusaide, bargomárkaniidda, dálonguovllu ovddideapmái, johtolatvuogádahkii ja luondduriggodagaid suvdilis geavaheapmái ja birrasa suodjaleapmái laktáseaddji barggut.

Mii fállat bálvalusaid sámegillii sámiid ruovttuguvlui ja árbevirolaš ealáhusaide laktáseaddji áššiin. Mii leat sámegielat neahttasiidduidasamet jorgalahttán sámegillii sisdoaluid, mat laktásit boazodollui, nuortalaš áššiide ja Deanu guollebivdui, daningo dáid áššiid olis mii sáhttit fállat dieđuid sámegillii ohcanskoviid ráje. Eará EJB-guovddáža barggut ja bargguide laktáseaddji bálvalusat leat govviduvvon dárkilabbot suomagielat siidduineamet. Mii jorgalahttit sisdoaluid álo dárbbu mielde – hás válddát roahkkadit midjiide oktavuođa, juos dárbbašat dieđuid muhtin fáttá dahje bálvalusa birra sámegillii!

Mii figgat almmustahttit buot sámiid ruovttuguvlui laktáseaddji áigeguovdilis ođđasiid, dieđáhusaid ja gulahusaid sámegillii jorgaluvvon hámis. Mii váldit jorgalandárbbuid vuhtii vejolašvuođaid mielde sámiid ruovttuguovllu dáhpáhusain ja dilálašvuođain. Mii jorgalahttit dárbbu mielde sisdoaluid buot golmma Suomas hállojuvvon sámegielaide (davvisámegiella, nuortalašgiella ja anárašgiella).