Guollebivdu Deanus

 

Áigeguovdil:

Deanu čázádaga guolástannjuolggadusat

Deanu guolástannjuolggadus vuođđuduvvá Suoma ja Norgga gaskasaš guolástansoahpamuššii. Soahpamuš guoská buohkaide, geat guolástit Deanu guovllus.

Deanu oalgečázádatásahus:

Deanu guolásteami bearráigeahččit

  • Jorma Harlin, +358 40 843 9093
  • Juha Valle, +358 40 180 1588
  • Niilo Kalevi Länsman, +358 40 861 9052
  • Jouni Högman, +358 40843 9094

Deanu čázádaga luossabivdogielddus 2025


Deanus luossanáliid dilli hedjonii čielgasit ovddit jagiid ektui geasset 2024. Sihke luosa gođđomáttodagat ja árvalusat luossanáliid sturrodagas ovdal makkárge guollebivddu ledje vuollelabbos go dábálaččat. Dán dihtii Suoma ja Norgga virgeoapmahaččat sohpe Deanu guolástansoahpamuša 6–7 artihkkala ráđđádallamiin, ahte luossabivdui eai gávdno ákkat jagi 2025 (Stáhtaráđi ásahus guolásteamis Deanu čázádagas Norggain dahkkojuvvon soahpamuša 6 ja 7 artihkkalis oaivvilduvvon beavdegirjjis 16/2025).

Deanus oažžu ain guolástit eará šlájaid go Atlántta luosa ja mearrarávddu. Dán várás guolástannjuolggadussii leat girjejuvvon sierra guolástanmearrádusat. Mátkkošteaddjiid várás fállun leat eará guliid guolástanlobit, mat addet rievtti geavahit geahppa dolgevuoggareaidduid. Dasa lassin ruoššaluosa čuozihuvvon guolásteapmi lea vejolaš báikkálaš organisašuvnnaide guolástanrievtti hálddašeaddji jođiheami vuollásažžan, Lappi EJB-guovddáža dohkkehan fitnuid vuođul. Ruoššaluosa čuozihuvvon guollebivdu viiddida ruoššaluosa bivdovejolašvuođaid. Dasa lassin ruoššaluosa oažžu lunddolaččat bivdit eará guliid bivdui ostojuvvon guolástanlobiiguin, guolástannjuolggadusas meroštallojuvvon guolástanvugiiguin.

Spiehkastatlohpeohcamušat

Ruoššaluosa čuozihuvvon bivddu ohcamušskovvi:

Deanus ráhkkanit ruoššaluosa fámolaš lassáneapmái ja ruoššaluosa čuozihuvvon jávkadanbivdui. Guolástannjuolggadusa 35 § mielde Lappi EJB-guovddáš sáhttá mieđihit báikkálaš organisašuvnnaide lobi ruoššaluosa čuozihuvvon jávkadanbivdui, juos fidnu ii ráddje mearkkašahtti láhkai luosa goargŋuma. Báikkálaš organisašuvnnat mearkkašit dán oktavuođas ovdamearkka dihtii guolledoalloguovllu, oasusgottiid dahje guollebivddu hárjeheapmái laktáseaddji servviid, maid ruovttubáiki lea Deanu čázádaga golganguovllus. Jávkadanbivddu ferte ollašuhttit guolástanrievtti hálddašeaddji jođiheami vuollásažžan. Jávkadanguolásteami lobiid viidodat heivehuvvo luossanáliid dillái. Čuozihuvvon jávkadanbivddu lassin ruoššaluosa oažžu bivdit eará guliid bivdimii ostojuvvon guolástanlobiiguin guolástannjuolggadusas meroštallojuvvon guolástanvugiiguin (geahppa dolgevuoggareaiddut).

Viečča ohcanskovi (pdf dahje doc-fiila) iežat rusttegii ja sádde devdojuvvon ohcanskovi šleađgapoastta mielddusin čujuhussii [email protected] bajilčállagiin Deanu spiehkastatlohpeohcamuš. Sáhtát maid čálihit olggos devdojuvvon ohcanskovi ja sáddet dan poasttain čujuhussii PL 8060, 96101 Rovaniemi, čále reivii Deanu spiehkastatlohpeohcamuš. 

Ávžžuhit doaimmahit ruoššaluosa jávkadanbivdofitnuid skoviid maŋemustá 31.5.2025. 

Sállaša almmuhangeatnegasvuohta

Deanus guoskaduvvo Suoma ja Norgga gaskasaš soahpamuš guolásteamis Deanu čázádagas (guolástansoahpamuš), Deanu čázádaga guolástannjuolggadus (guolástannjuolggadus) ja stáhtaráđi ásahus guolásteamis Deanu čázádaga oalgečázádagain jagi 2025 (oalgečázádatásahus) šaddi almmuhangeatnegasvuhtii laktáseaddji njuolggadusat.

Guolástannjuolggadusa almmuhangeatnegasvuođanjuolggadus (33 §) guoskaduvvo guolástansoahpamuša 2 artihkkala 1 čuoggás oaivvilduvvon rádjájohkaosiin dahjege Deanu, Anárjoga ja Skiehččanjoga dain guovlluin, gos Suoma ja Norgga gaskasaš váldegotti rádjá manná. Guolástannjuolggadusa 33 § mielde guolásteaddjis lea geatnegasvuohta bajásdoallat sálašbeaivegirjji (elektrovnnalaš hámis dahje báberhámis) ja almmuhit Deanu čázádaga elektrovnnalaš sálašregistarii guđege bivdojuvvon lussii, guvžái, mearrarávdui, ruoššalussii ja girjelussii guoski dieđuid. Dárkilut gáibádusaid almmuheamis sáhttá dárkkistit guolástannjuolggadusa 33 §:s. Almmolaš báikegoddálašlobi ja báikegoddálačča stággobivdolobi hálddašeaddji ferte dahkat almmuhusa čakčamánu 1. beaivvi rádjái. Ovdalis namuhuvvon lohpehálddašeaddjit galget lassin addit elektrovnnalaš sálašalmmuhusa dahje báberhámat sálašbeaivegirjji guolásteamis,  mii lea dáhpáhuvvan ovdal vahku 27, maŋimustá vahku 27 vuossárgga rádjái.

Oalgečázádatásahusa almmuhangeatnegasvuođanjuolggadus (23 §) guoskaduvvo fas guolástannjuolggadusa 2 artihkkala 2 čuoggás oaivvilduvvon čázádaga luosa goargŋunguovllus (dárkilabbot guovllus gč. oalgečázádatásahusa 1 §). Oalgečázádatásahusa 23 § mielde guolásteaddji ferte bajásdoallat sálašbeaivegirjji elektrovnnalaš hámis dahje báberhámis. Guolásteaddji galgá maid almmuhit Deanu elektrovnnalaš sálašregistarii guđege bivdojuvvon lussii, dápmohii ja girjelussii guoski dieđuid. Dárkilut gáibádusaid almmuheamis sáhttá dárkkistit oalgečázádatásahusa 23 §:s. Sálašalmmuhusa ferte dahkat ovdal čakčamánu 1. beaivvi.

Ále fievrrit luossaparasihta viidásabbot!

Fatnasat, kanohtat ja buot guolástanreaiddut ja -biergasat, mat buktojuvvojit Badje-Sámi čázádagaide, fertejit leat oalát goikásat ja desinfiserejuvvon ovdal go dat geavahuvvojit (Eanan- ja vuovdedoalloministeriija ásahus 1376/2004). Desinfiserenstašuvnnaid ferte geavahit álo, juos váháge eahpida, leatgo fatnasat dahje reaiddut, ovdamearkka dihtii gállinbuvssat dahje hoavat, ráidnasat.

Gyrodactylus salaris lea sullii 0,5 mm guhku parasihtta, mii eallá luosa liikkis, iige dan sáhte áicat beare čalmmiiguin. Luossa dihtto dábálaččat jogain, mat luitet Nuortamerrii, gos dan eai leat gávnnahan dagahit luossaveajehiid jápmima. Atlántii luoiti jogaid luossanáliin ii leat immunitehta parasihta laskama vuostá. Parasihtta leage dagahan luosa johkaveajehiid jápmima lagabui 40 jogas Norggas. Dárkilut dieđut parasihtas ja dan caggamis gávdnojit Biebmovirgedoaimmahaga siidduin (ruokavirasto.fi).

Desinfiserenbáikkit

Anára guollehámmana guolástanreaidduid desinfiserenbáiki lea rabas geasset suoidnemánus. Anáris sáhttá desinfiseret maiddái Neste-fuolahagas. Dasa lassin desinfiserenbálvalusat leat oažžun láhkai Deanu lohpebáikkiin daid rabasáiggiid ja Avvila SEO-fuolahagas ja Njávdánjoga guoras Čeavetjávrri báras.

Deanu lohpebáikkit, main guđege báikkis sáhttá desinfiseret, dalle go dat leat rabas:

  • Nuorgamin Lomakeskus Nuorgamintie 4401 A, 99990 Nuorgam, puh: +358 400 294 669, [email protected] 
  • Veahčaka Leirintämökit Ay Vetsikontie 55, 99980 Utsjoki, +358 400 617 016, +358 407 569 346 (Minna), [email protected] 
  • Tenon Lohituvat ky Nuorgamintie 245 b, 9998 Utsjoki, puh: +358 405 879 097 (Maritta), [email protected] 
  • Camping Lapinkylä Utsjoentie 14, 99980 Utsjoki, puh: +358 405 591 542, [email protected]
  • Tenon tunturituvat ky Tenontie 2673, 99980 Utsjoki, puh: +358 407 533 818, [email protected] 
  • Gilidállu Saivu Ylätenontie 33 A, 99950 Karigasniemi, puh: +358 407 286 822, [email protected]